suplik.dts.cz   
24.10.2017 - 13:04:58

Svátek má Nina   


  Brána DTS

Rozcestník
Šuplík
Comenius
Vtipník
Pomůcky DTS


  Šuplík

Výuka
Věda a technika
Čeština
Internet a počítače
Ekologie
Prevence
Adresář prevence
Umění a kultura
E-projekt
Lužice
Edison

7.11.2003 - Lužice - PaedDr. Jiří Týř
EUROREGION NISA/ NEISSE/ NYSA - " ŁUŽICA A EUROPSKA UNIJA"
W zašłym lěće stej wobydlerske zjednoćenstwo TROJMEZÍ. CZ a koordinaciska rada projekta " ŁUŽICA A EUROPSKA UNIJA" přihotowałoj program zajězda zapósłancow Podkomiteja za hranicu překročace zhromadne dźěło a regionalny wuwiće Komiteja za europsku integraciju parlamenta Čěskeje republiki. Hłowny cil bě, zeznajomić so z projektom LEU, kotryž ma nadawk, zesylnić mjezsobne zwiski mjez Čechami a Serbami w konteksće pokročowaceje europskeje integracije. Zendźenje wotmě so 16. septembra 2003 w Libercu, w Chrastavje a ve měsće Hrádek nad Nisou, druhi dźeń pak w Budyšinje. Hłowny dypk wobjednanja bě - móžnosće sobudźěła na polu šulstwa.
Wobdźěli so šěsć zapósłancow komiteja VEI (=komitej za europske zhromadne dźěło) pod nawodom swojeho předsydy Pavla Suchánka. Delegaciji přisłušachu zapósłancy J. Kohlíček a P. Lachnit (zastupjerjej předsydy), S. Marková, O. Němec a J. Zvěřina.
Dopołdniši program bu zahajeny w rumnosćach wobwodneje hospodarskeje komory. Mjez přitomnymi bě J. Musil (KHK), za Liberecki wokrjes zastupjerka hejtmana E. Bartoňová a R. Gamba za šulstwo, za wobwod Usti M. Hrabal z měsćanskeho zarjada Varnsdorfa, J. Čeřovský, I. Hübnerová a P. Branda za Euroregion Nisa, V. Cvrček za pedagogiski centrum w Libercu, V. Poštolka za Technisku uniwerzitu w Libercu (katedra geografije pedagogiskeje fakulty TU Liberec), P. Maryška za ministerstwo za zwonkowne naležnosće, R. Čermák za Towarstwo přećelow Łužicy w Praze, J.Týř a F. Vydra za wobydlerske zjednoćenstwo TROJZEMÍ.CZ, kotrež bě cyłu akciju inicěrowało.
Ze serbskeje strony bě přitomna delegacija: B. Cyž jako jednaćel Domowiny, B. Pawlikec za rěčny centrum Witaj, farar Š. Delan za Towarstwo Cyrila a Metoda.
W běhu dopołdnišeho dźěla posedźenja, moderěrowaneho wot koordinatora projekta Łužica a EU, J.Týřa, zeznajomnichu so přitomni z Euroregionom Nisa, Libereckim wobwodom a z cilemi projekta Łužica a EU a diskutowachu wuchadne mysle wzajomneho zhromadneho dźěła.



Na popołdniše jednanja podachu so wobdźělnicy do domu Euroregiona Nisa k wobjednawanju konkretnych móžnosćow zhromadneho dźěła. Na jednanjach wobdźěli so tež sekretar němskeho dźěla Euroregiona Nisa, Gerhard Watterott. W poměrje mjez Euroregionom a projektom Łužica a EU mějachu jednanja tute hłowne dopóznaća a wuslědki:
- Zakład skutkowanja Euroregiona su dźěłowe skupiny. Jich problem je, zo husto njeje móžno, zapodać zhromadne projekty třoch krajow (aktiwity dyrbja so husto njetrjebawši dźělić do projektow dweju krajow).

- Za projekt LEU je šansa wosebje w stajnych dźěłowych skupinach za hospodarstwo, turistiku a kulturu. Přihotuje so nowa skupiny za šulstwo, kotraž změje nadawki spjelnić při wuwiću hranicy překročaceho zhromadneho dźěła w zakładnym, srjedźnym a wysokošulstwje. Serbam a koordinaciskej radźe projekta Łužica a EU bu wutrobiće poskićena móžnosć, sobuskutkować we wšěch tutych skupinach.

- Euroregion NISA přihotuje poměrnje wuznamne aktiwity k dnjam wokoło
přistupjenja Čěskeje republiki do EU, to rěka wokoło spočatka meje 2004. Wone překroča w swojim wuznamje tež hranicy Euroregiona hladajo na to, zo so w Trojzemi Nisa zjednoćitaj dwaj krajej, kotraž staj přistupnej kandidataj do EU z krajom, kotryž je hižo z čłonom EU. Projekt Łužica a EU k tomu přinošuje nic jeno z tym, zo so na tym wobdźěli, ale tež ze swójskej aktiwitu pola najsewjernišeho pomnika Cyrila a Metoda, kotryž su Łužiscy Serbja před něšto časom postajili k Swjatemu lětu 2000. Liči so z wobdźělenjom wuznamnych wosobinow statneje a europskeje runiny.

- W Euroregionje Labe přihotuje so projekt turistiskeho wužiwanja akcija jězbow z historiskimi parnymi lokomotiwami z Děčína do Dolní Poustevny. Tale trasa móže so podlěšić hač do Budyšina, Varnsdorfa, Žitawy, Hrádka nad Nisou a Liberca.

- Serbske Towarstwo Cyrila a Metoda je poskićene dóstało objekt bywšeje starownje swj. Ludmile , kotryž chce přetworić po přikładźe Centruma za duchowne wobnowjenje w Hejnicach a wužiwać tež za hranicu překročace zhromadne dźěło na polu šulstwa a zetkawanja młodźiny.

- Na nastork koordinaciskeje rady projekta LEU su so hižo přewjedli prěnje jednanja
mjez Gymnazijom F.X.Šaldy w Libercu a Serbskim gymnazijom w Budyšinje (studijne wuměny, zhromadne dźěło pedagogow, zhromadne dźěło při wužiwanju interneta a dr.). Pedagogiski centrum w Libercu realizuje w zhromadnym dźěle ze Serbami kurzy serbšćiny za čěskich wučerjow, kotřiž bychu w přichodźe chcyli skutkować na serbskich šulach. Runočasnje z tym budźe Pedagogiski centrum a Wotrjad za šulstwo Libereckeho wobwoda dźěłać na intensiwnišim a kwalitnišim wuwučowanju němčiny na zakładnych šulach w Libereckim wobwodźe. To je wuměnjenje za to, zo bychu absolwenća čěskich zakładnych šulow móhli wuknyć na přikład na Serbskim gymnaziju a wotpołožić tak němsku maturitu a z tym měć jednoriši puć na němske wyše šule. Bjez němčiny to njeje móžne. Projekt zhromadneho dźěła ze Serbami přinošuje takle k přewinjenju rěčnych zadźěwkow w Euroregionje Nisa.

- Podobnje liči so w projekće LEU z rozšěrjenjom wuwučowanja čěšćiny na serbskich
zakładnych šulach, zo bychu tež Serbja w přichodźe móhli wuknyć na čěskich wukubłanišćach a srjedźnych fachowych šulach, dokelž dźě žane swójske serbske nimaja.

- Wjetšina tutych zaměrow da so zwoprawdźić z financielnej pomocu europskich fondsow (INTERREG III a, Socrates). Přihoty a realizacija tutych projektow su jara naročne dźěło, kotremuž móže pomhać wobdźělenje požadarjow na dźěłowych skupinach Euroregiona, dokelž tam maja nazhonjenja a wědu, kotraž je trěbna k spjelnjenju žadanjow EU.

- Wšitke tute ideje buchu wot wobdźělnikow positiwnje přiwzate. Zapósłancy parlamenta ČR su slubili po swojich móžnosćach pomoc k zwoprawdźenju namjetow abo znajmjeńša k docpěću lěpšich wuměnjenjow k jich spjelnjenju. Wobdźělnikam projekta zhromadne dźěło ze Serbami buchu poskićene dobre a najwšelakoriše składnosće k zhromadnemu dźělu a bu poskićena pomoc dalšich wobdźělenych organizacijow k dócpěću cilow projekta. Nětko zaleži na koordinaciskej
radźe projekta a předewšěm na Serbach samych a jich organizaciji Domowina, hač tute
móžnosće połnje wužija. Čěski a němski dźěl Euroregiona Nisa, wobwodne organy
Liberecka a parlamentny wuběrk su přihotowani, jim při tym skutkownje pomhać.


Po tutych popołdnišich jednanjach podachu so wobdźělnicy do Chrastavy. Měsćanosta M. Canov přepoda mjezdruhim serbskim přećelam jako darik serbsku werziju Periodiskeho systema elementow, kotryž je wón jako wučer stworił. Dale podachu so wobdźělnicy do Hrádka nad Nisou. Klětu wotměja so tutym měsće na třoch mjezach
wažny dźěl hižo naspomnjenych swjatočnosćow składnostnje přistupa ČR k EU.

Starosta Hrádka nad Nisou M. Půta přeprosy wšitkich wobdźělnikow na wječork při brjoze spjateho jězora "Kristýna" při němsko-pólskej mjezy. W programje wustupi chór budyskeho gymnazija pod dirigatom kantora F. Böhmy.


Na tutym towaršliwym wječorku wobdźělichu so nimo wjetšiny wobdźělnikow prěnjeho dnja jednanjow za
saksku stronu tež G.Watterott a dalši němscy přećeljo, mjez nimi měsćanosta města Žitawy, Arndt Voigt.


Přichodny dźeń, 17. septembra, dojědźechu sej wobdźělnicy do Budyšina, zo bychu so mjezsobu zeznali, předstajili wuslědki prěnjeho dnja a dale jednali wo zhromadnym dźěle. Dopołdniše jednanja zahaji předsyda Domowiny Jan Nuk. Nimo pósłancow podwuběrka VEI bě wjetšina wobdźělnikow z prěnjeho dnja a tohorunja předsyda Euroregiona Nisa, Petr Skokan, kiž je zdobom měsćanosta wokrjesneho města Česká Lípa. Tež ze sakskeje strony běchu přitomni někotři dalši wobdźělnicy.

Hladajo na projekt Łužica a EU móžemy wuslědki jednanjow zjimać do dweju dypkow:

- Přitomni zeznajomnichu so z hłownymi dokumentami projekta LEU (Wuchadne mysle projekta, Hłowne cile projekta, Cile projekta za šulstwo). Direktnje w Budyšinje buchu přediskutowane móžnosće skutkowneho zhromadneho dźěła. Dokumenty a cile projekta Łužica a EU buchu zwjetša positiwnje přijate wot wšitkich wobdźělnikow. Přitomni zwuraznichu swoju zwólniwosć, po swojich mocach při zwoprawdźenju cilow projekta pomhać. Zaležeć budźe to předewšěm na Serbach, hač móžnosće zhromadneho dźěła z čěskej stronu a z Euroregionom Nisa wužija.

- Čłonojo parlamentneho podwuběrka VEI (zapósłancy) slubichu tohorunja zhromadne dźěło ze serbskej stronu a z koordinaciskej radu projekta Łužica a EU při rozrisanju problema dosahaceho zastupowanja zajimow narodnostneje mjeńšiny Łužiskich Serbow pola organow Europskeje unije, kotrejež sobustawojo woni su, wotpowědnje zasadam mjeńšinoweje politiki EU.


Přitomni pak njejsu sej jenož wažne wěcy sobuzdźělili a diskutowali. Wobhladali su sej tež čěsko-serbsko-němski wideomagacin młodostnych, kotryž bě nastał w času wulkich prózdnin w tak mjenowanej Lěćnej šuli za wideotechniku, přewjedźenej wot koordinaciskeje rady projekta Łužica a EU w zhromadnym dźěle ze studijom SAEK. Program, kotryž su gymnaziasća z wobeju krajow zastajeli, je na žortne wašnje pokazał móžnosće, kak móža Serbja trajnje přinošować nic jenož k přewinjenju rěčneje barjery w Euroregionje Nisa.


Na kóncu jednanjow w Serbskim domje wuměništaj sej předsyda Domowiny Jan Nuk a předsyda parlamentneho komiteja Pavel Suchánek hóstne dary. Atmosfera a hłowne wuslědki jednanjow wobkrućichu, kaž su hižo dźeń do toho zwěsćili, zo je Euroregion Nisa jedyn z najlěpšich euroregionow hladajo na swoju fachowu kompetencu, znajomosć we wěcy, aktiwnosć a hospodarske wuslědki, ale tež přez swoje wzajomne nastajenje při rjadowanju čěsko-němskich poćahow a w swojim nastajenju narodnostnym mjeńšinam napřećo.




Po dźěłowym wobjedźe w kofejowni w Serbskeho domu wočakowaše wobdźělnikow wjedźenje po Budyšinje. Jich přewodźeše žurnalist z redakcije Serbskich Nowin Manfred Laduš, kotryž na putace wašnje wujasnjowaše čěskim wobdźělnikam historiske zajimawostki města nad Sprewju.Hornja Łužica słušeše hač do lěta 1635 k čěskemu kralestwu. Bjezdźiwa tuž, hdyž při wobhladanju historiskeho Budyšina dóńdźeš ke korčmje, kotraž je pomjenowana po čěskim rubježniku Karaseku, kotrehož postawa přeprošuje nimoduceho k wopytej...
Tachantska cyrkej swj. Pětra je přikład za nabožnu tolerancu. Na kěrchowje Mikławšk su rowy serbskich wótčincow (Hórnik). Jónkrótna je panorama budyskich wěžow.


Na wuchodźowanju po Budyšinje njewobdźěli so jednaćel Domowiny a wjednicy čěskeje a němskeje strony Euroregiona Nisa. Woni mějachu posedźenje pola jednaćela, zo bychu wujednali prěnje konkretne kročele přichodneho zhromadneho dźěła.


Po nawróće do Serbskeho domu přitomnych wočakowaše najnowše čisło Serbskich Nowin, kotrež wozjewjeja nastawki a fotografije z dopołdnišich jednanjow wobdźělnikow projekta LEU.


(Na foće diskutuja O. Němec, M. Hrabal, P. Lachnit a J. Kohliček z předsydu Nukom.)

Po rozžohnowanju podachu so čěscy wobdźělnicy wróćo do Žitawy a Hradka n.N. k 40 km zdalenej hranicy z Libereckim krajom.

Hrádek nad Nisou, dnja 18. septembra 2003

KONTAKT: PaedDr. Jiří TÝŘ
koordinator projekta LEU
o.s. Trojzemí.cz
HRÁDEK nad Nisou
tel.:603 162 337
e-mail: tyr@dts.cz

PhDr. František VYDRA
čłon koordinaciskeje rady LEU
CHRASTAVA
tel.: 485 143 161
e-mail: vydra@chrastava.cz



Příbuzné články:
Jiří Týř: LUŽICE A EU, výchozí myšlenky projektu
Josef Ladra: Co dělat pro Lužici?
Leoš Šatava: Lužičtí Srbové a Evropská unie
Jan Nuk: Co by Lužičtí Srbové potřebovali
HŁOWNE MYSLIČKI K PROJEKTEJ "ŁUŽICA A EUROPSKA UNIJA"
PROJEKT ŁUŽICA A EUROPSKA UNIJA
ŁUŽICA A EUROPSKA UNIJA
Nejbližší cíle projektu Lužice a EU
O realizátorech projektu Lužice a EU
LUŽICE A EU: Společnost, kultura a vzdělávání
LUŽICE A EU: Informace a komunikace, Instituce a organizace
LUŽICE A EU: Ekonomická spolupráce
Budyšín a okolí - výlet do Horní Lužice
Seminář Lužice a EU - program a účastníci
Lužice a EU - fotoreportáž a zpráva ze semináře
Leoš Šatava: Die Lausitzer Sorben und die Europäische Union
Die Lausitz und die Europäische Union
Žádáme o zachování chrosiické lužickosrbské školy - Petition für den Erhalt der sorbischen Mittelsch
Erhalt der sorbischen Mittelschule Crostwitz - Odpověď saského Ministerstva kultu (německy)
Zachování lužickosrbské školy v Chrosčicích - odpověď saského Ministerstva školství (česky)
Teze pro nařízení Saského státního ministerstva školství ohledně lužickosrbských škol
Lužice a EU: Návrhy lužickosrbské strany pro jednání výjezdního zasedání podvýboru VEI PS PČR
HLAVNÍ CÍLE PROJEKTU LUŽICE A EU
Euroregion Nisa: Výjezdní zasedání podvýboru VEI - Lužice a EU
Im Geiste Alois Andritzkis - V duchu Alojse Andrického
EUROREGION NISA/ NEISSE/ NYSA - " ŁUŽICA A EUROPSKA UNIJA"
TROJZEMÍ.CZ - NA KRISTÝNĚ PŘÁTELSKY O EU
NOVÝ SERVER TROJZEMÍ.CZ
4. Novoroční přátelské setkání na Kristýně bylo o vzdělávání a EU

Komentáře:
Přidat komentář
     (c) 1996-2008, Dr. Jiří Týř Powered by Linux